Une assemblee a Porpêt par fâ il pont su la Alte
Velocitât inte nestre regjon. Firmât l’acuardi
cu la Slovenie e cul Venit. La Tav si fasarà ma
no si sa cuant par vie dai bêçs che no son. I
comitâts no molin: “La Tav no covente”.
Tav, la ore
des sieltis
La nestre Regjon dutun cul Venit e
à alfin dade uficialitât al acuardi pal
percors de Slovenie fin Vignesie. Firmât
l’acuardi cu la Slovenie il 12 di
Otubar a Triest, marcât chel cul Venit,
fat un pas indenant par vê la gnove
linie a alte velocitât. La biele Val
Rosandre e je fûr pericul e la Regjon
e je plui dongje al mont slâf, la gnove
linie e à cjatât il so percors, plui adalt
di ce che si cjacarave fin pôc timp
indaûr, il percors al sarà di Monfalcon
a Aurisine (Nabrežina) a Opcine, taiant
in bande di fat la citât di Triest.
Par ce che al interesse la basse furlane
e corarà dongje, si pense a pene
sot vie, de autostrade A4 ma di precîs
la int e podarâ savê il percors dopo
presentât il progjet in Europe. I doi
presidents des Regjons confinantis,
Renzo Tondo e Luca Zaia, a àn
timp doi mês par consegnâ i prins
progjets a Bruxelles e par no
pierdi i bêçs de progjetazion.
Contents ancje i sot ministris
talian e sloven, Roberto Castelli
e Igor Jakomin. Castelli
al à vût dit: «O vin metude la
firme su di un acuardi che al segne,
une volte par dutis, un percors che al
è condividût dai ents dal teritori e
mancul dispendiôs di chel che o vevin
pensât tal imprin».
Jenfri dal ultin dal an, al varà di
jessi prontât il progjet di Triest a Vignesie
par no pierdi i finanziaments
pai progjets (2,5 milions di euros) dai
colegaments de linie de alte velocitât
di Otubar feroviarie. Tal presentâ
il risultât cussì si spindeve l’assessôr
furlan Ricart Riccardi: «La
nestre Regjon e po deventâ la grande
place de logjistiche de Europe,
no dome par chê centri orientâl, ma
ancje par chê dal Baltic. E in chest
moment storic il progjet de Tav al è
un grum impuartant.
La firme dal acuardi e à puartât dongje un risultât:
e sarà Triest dulà che e vignarà
logade la progjetazion». Tant no si
sint plui cjacarâ ator di alte capacitât
che e sarès la maniere par lassâ
cori i trens mercis su chê stesse linie
dai trens viazadôrs sbassant a
chescj la velocitât.
Europe: “Bêçs par cui
che al rive prin”
Tes zornadis passadis, il responsabil
european dal “Curidôr 5”, Jan
Brinkhorst al è stât a cjatâ i sorestants
des dôs Regjons. Brinkhorst
al sburte a vê une cierte premure
parcè «cui che al rive prin, al à plui
grandis pussibilitâts di rivâ ai pôcs
bêçs de Europe!». Tant che a son
daûr a spietâ il progjet i doi presidents,
Tondo e Zaia a domandin une man
a Brinkhorst par cunvinci la Europe
a sostignî la grande opare:
«La mê poie – al à rispuindût lui –
e je dute, ma o vês une grande
concorince de bande dal nord
Europe che al va un grum indenant».
Brinkhorst al à zontât che al fasarà
dut il pussibil par rivâ insomp co al à
cjatât pront su la taule un acuardi
Triest Divaca (Divaccia), ven a stâi
il percors alt che al lasse in bande la
Val Rosandre (polmon vert dai triestins):
di Monfalcon, su par ju su la
vecje linie, chê che e va di Aurisine a
Opicine gran part in trincee e in galarie.
«Si fasaran galariis juste in bande
ae linie che e funzione cumò – al
dîs Pastorutti, puartevôs dai comitâts
No Tav – pecjât che in dì di vuê, su
chê linie, a corin nome cuatri trens
mercis par zornade. A di cui coventie
une gnove infrastruture?».
L’acuardi pal toc furlan, daûr ce
che a disin i nestris aministradôrs,
al è un pressapôc fat, e la linie e
corarà dongje la autostrade, ma te
basse furlane il discors al è invezit
ancjemò viert. Il progjet no si sa ce
che al metarà neri su blanc e al mancje
il benstâ e la aprovazion di ducj i
comuns interessâts e de int dal puest,
massime in cualchi comun plui spaventât
des conseguencis.
I dubis sul percors
Il president de Regjon Tondo al à
declarât: «Lis sieltis sul percors a son
fatis, Friûl e Venit a varan un progjet
unic tai timps stabilîts. La Regjon Friûl
e à cjacarât clâr, la Tav e corarà in
bande ae autostrade a trê corsiis, po
par lâ in Slovenie e corarà sul Cjars
cence rivâ in citât a Triest.» Dubiis
sul percors a son ancjemò sui detais
e sul toc Gruâr Vignesie. In chel teritori
sedi la provincie di Vignesie tant
che Rfi a vevin un diferent orientament
e cumò a àn di fâ i conts cul
percors dongje alis spiazis cun mancul
vantaçs pe logjiche feroviarie.
Tal Venit a àn voie di vê la gnove
linie dongje dal mâr. Par no meti lis
mans tal plat un di chel altri, ognun
dai doi presidents des Regjons confinants,
al à sielzût ce che i à parût
daûr dai interès dai lôrs teritoris. Ce
che a volevin i sorestants furlans lu
si saveve, la novitât dal Venit di vê la
gnove linie ferade dongje des splazis,
e vierç gnûfs cantins che a podaran
impenzî ancje la eventuâl realizazion
dal toc furlan. Brinkhorst, che
al jere dongje dai doi presidents al à
confermât: «La Europe e rispiete lis
sieltis des regjons e nuie e po dî sul
percors, vonde al è che si rispieti lis
regulis sul ambient».
Un grum di protestis dai sindics dal
Venit orientâl a i àn fat un pas indaûr
a Zaia:«O vevi dome fat presint che,
cun 32 milions di turiscj su lis splazis
dal nestri mâr, la Tav e varès vût di
tignî cont di chel fat. A saran lis societât
Rfi e Italfer a meti a pont il
progjet. E lu fasaran – al à zontât
Zaia – dentri dai 16 di Dicembar, co
a Triest o varìn un altri incuintri cul
coordinatôr european Ian
Brinkhorst».
Il NO dai comitâts
«Cumò e à di partî pardabon la vere
progjetazion, chel che o vin di mostrâ
jenfri la fin dal an ae Europe, al
è nome un progjet provisori», lu à dit
l’assessôr competent Riccardi dulinvie
la serade inmaneade dai comitâts
no Tav a Porpêt vinars ai 15 di
Otubar. In chê serade a jerin plui di
dusinte di lôr a scoltâ lis ultimis novitâts
su la cuestion. Pal Pd e jere presinte
la parlamentâr europeane Debora
Serrachiani cunvinte ancje jê
che la gnove opare e gjavarà il Friûl
de emargjinazion dai traspuarts europeans
jessint dentri dal “Curidôr 5”
Lisbona- Kiev. I doi, Riccardi e la
Serrachiani, si son becâts no tant sul
fâ la opare, pitost, sul rispiet o mancul
dal teritori. Riccardi al à marcât
che: «No si àn di meti in discussion
lis sieltis europeanis e che coscj e
vantaçs si podaràn viodi nome ae fin
de valutazion ambientâl no ancjemò
tacade». «Il percors – e dîs la Serrachiani
– al varès di restâ pareli ae
autostrade Vignesie Triest, ma l’aministrazion
dal Venit e vûl spostâle a
sud, fasint cussì e devente plui costose
e cu la probabilitât che no si
fasedi nancje».
Ce disino i puartevôs dai comitâts
No Tav? Te semblee di Porpêt, ni Riccardi
tant mancul la Serrachiani, a àn
vût rispuindût a lis lôr domandis, ven a
stâi: «Ce ise in dì di vuê come progjet
il toc Alte velocitât/Alte capacitât dal
“Curidôr 5” Vignesie Triest? A ce coventie?
Trop costie? Cuant vignaraie
fate?», par chel i doi puartevôs dai No
Tav, Giancarlo Pastorutti e Paolo
De Toni, a àn dite «O disin che la
nestre int no vûl cheste opare parcè
che no covente e po e puarte masse
sdrumarie al teritori, nô o larìn indenant
cu lis nestris resons, o rivarìn fintremai
in Europe, a Bruxelles, là che
o vin une puarte vierte.»
Te assemblee di Porpêt i orgazinadôrs
a àn vût mostrât filmâts là che si
podeve scoltâ il geolic di RFI dr. Carlo
Comin (dal grup dai progetiscj),
che al diseve che la Av/Ac no varès
plui sens pe mancjance di passeziirs,
e che cheste opare e viodarà la fin
pene ca di un 70-80 agns, par vie che
no son i bêçs par fâle. Il rapresentant
des feroviis, in plui di une semblee publiche
al à vût sostegnût che il trafic
pes mercis al è pardabon “pocje robe”,
che par chel di cumò la capacitàt des
liniis, cun cualchi modifiche (Udin Çarvignan
e ingredei dal grop di Monfalcon
e pôc altri) e sarès vonde.a za
sindiche dal comun di Porpêt, Cecilia
Schiff, fasint memorie des sôs batais
cuintri la Tav, e à metût ducj in
vuaite dal meti in vore la opare che e
smiezarà il paîs in doi.
La serade, chei dal Comitât No Tav,
le àn sierade cussì: “O sin partîts cun
chê di lâ cu la TAV di Triest a Milan
e Turin par vie che il traspuart feroviari
al sarà competitîf rispiet a chel
dai avions (Illy), daspò doi agns e mieç
o sin al pont che Triest la Alte velocitât
no le viôt par vie che cu la Alte
velocitât a si saressin sparagnâts
nome doi trê minûts e al è miôr lassâ
lis robis come che a son, che si po
gjoldi la costiere che al è simpri un
biel spetacul (Comin).
STEFANO GASTI
I comuns plui cjapâts dentri
Tisane, Palaçûl, Muçane, Porpêt,
Sant Zorç, Bagnarie, Çarvignan,
Vile Vicentine, Dael, Rude,
Flumisel, e po di là dal Lusinç, Sant
Canziàn, Staranzan, Roncjis di
Monfalcon, Monfalcon.
Dute la Tav in cinc domandis
A ce varessie di siervî?
Tal imprin si cjacarave di une
linie a une velocitât di 250 km/h
cumò si sint a dî une velocitât a
160km/h. Tant a dî pôc di plui di
ce che a puedin lâ cumò. Alore
tancj bêçs par ce motîf? Se
passizîrs e mercis a stan lant su
lis ruedis di gome? Cemût spostâ
trafic su fier? Di chest par cumò
no si cjacare.
Trop varessie di costâ?
L’acuardi al met un pont sui
coscj: 101,4 milions di euro, 50,7
a vignaressin de Union
europeane, 22 de Italie e 28,7 de
Slovenie. Jenfri trê agns, lis
”cjartis” a àn di jessi a puest. I
bêçs pai progjets a son, chei par
Tension ai prins di Setembar te basse: a
Bagnarie i Comitâts No Tav a àn fermât
lis provis cu lis trivelis che la dite di
Milan Rct e jere daûr a fâ cence vê
l’autorizazion dai proprietaris. A son
stâts clamâts i Carabinîrs e la imprese e
à scugnût fermâ i lavôrs.
scomençâ i lavôrs a àn di jessi
cjatâts.
Dulà cjatâ i bêçs pai cantîrs?
La Europe e po meti fin al 30%
dal cost e, al à vût dite Brinkhorst:
«Bisugne tacâsi ae programazion
2013-2020 e ancje in premure». I
prins cantîrs? Jakomin le bute li:
«ca di cinc agns». I prins trens? Il
viceministri Castelli al tire
compagn a induvinâ: «Forsit tal
2020».
Eurovignetis?
Viodût ben che flincars no ‘nd è
de Europe, e ven in jutori la
diretive «Eurovignetis». Lis regjons
a podaran incressi il presit des
autostradis pai mieçs pesants Euro
0 e Euro 1, chei che a incuinin di
plui, che a traviersin il teritori. «La
cuestion e je semplice – al spieghe
Renato Chisso, assessôr venit a
traspuarts e mobilitât – lis
pussibilitâts di menâ in puart
cheste opare a son pocjis, cun
chescj clârs di lune, a son a zero.
Se si pense di là a Rome e tornâ in
ca cu la sporte plene di bêçs, o vin
sorte. A coventin soluzions
diferentis. O bêçs dai privâts o
Eurovignetis, lis gnovis struturis si à
di finanziâlis cui passaçs in autostrade,
se no, no si fasaran». Clâr
che finanziâ la alte velocitât
fasintle paiâ ai camioniscj, a lôr no
i plâs nancje un tic. Francesc Del
Boca, president dai traspuartadôrs
par Confartigianato: «O sin
contrariis, a nô, chê infrastruture
no nus covente, se e va a vantaç
des feroviis – al dîs il president
dai camioniscj – che si le pain!»
Dulà sono i problemis?
Come che al dis Zaia pal Venit:
«O partin dal fat che là che o
decidin di meti il percors al sarà
un comitât cuintri». Al vûl dì che
lis sieltis locâls a son cjalcjadis
dal alt. Ricardi al conte sflocjis
cuant cal dîs che il percors de
basse nol è decidût. Il troi al è
chel dal Protocol Sonego firmât
ai 4 di fevrâr dal 2008 a
Çarvignan e al proviôt che Porpêt
al sedi tajât in doi! Di li, par
cumò, no si scjampe. «L’Italie no
po finî a Mestre!».